کسی بھی  طوفان کی آمد کی خبر پا کر انسان سکون سے نہیں بیٹھا رہ سکتا ۔۔۔لامحالہ حفظ ماتقدم کے طور پر حفاظتی تدابیر اختیار کرنے کا سوچتا ہے۔۔۔ارد گرد خبر رکھتا ہے اہل علم اور ماہرین سے مشورے کرتا ہے

آخرت کا دن ایسا ہے کہ جسے آکر ہی رہنا ہے۔۔۔جب جس وقت اللہ نے مقرر کررکھا ہے اسی  وقت ضرور آکر رہے گی۔

حدیث مبارکہ ہے آپ ﷺ نے فرمایا قیامت اور میرے درمیان (اپنی دو انگلیاں بلند کرتے فرمایا) صرف اتنا ہے (البخاری )

آخرت کا دن قریب آتا جارہا ہے

حضرت ابوہریرہؓ سے روایت ہے کہ رسولِ کریم ﷺ نے ارشاد فرمایا کہ “جلد از جلد اعمالِ صالحہ اختیار کرلو،ان فتنوں کے آنے سے پہلے جو اندھیری رات کے ٹکڑوں کی طرح یکے بعد دیگرے آئیں گے،(حال یہ ہوگا کہ) آدمی اس حال میں صبح کرے گا کہ وہ ایمان والا ہوگا اور شام اس حال میں کرے گا کہ وہ ایمان سے محروم ہو چکا ہوگا”۔

نبی کریم ﷺ کا ارشاد ہے کہ “عنقریب فتنے پیدا ہوں گے،ان فتنوں میں بیٹھنے والا،کھڑے ہونے والے سے بہتر ہوگا اور کھڑا ہونے والا چلنے والے سے بہتر ہوگا اور چلنے والا سعی کرنے والے ( یعنی کسی سواری کے ذریعہ یا پیدل دوڑنے والے اور جلدی چلنے والے)سے بہتر ہوگا اور جو شخص فتنوں کی طرف جھانکے گا فتنہ اس کو اپنی طرف کھینچ لے گا،پس جو شخص ان فتنوں سے نجات کی کوئی جگہ یا پناہ گاہ پائے تو اس شخص کو چاہیے کہ اس کے ذریعہ پناہ حاصل کرلے

قرآ ن و احادیث میں دجال کا فتنہ یا قرب قیامت کی علامات کے بارے میں پڑھیں تو  ایسا محسوس ہوتا ہے کہ اس دور میں  سب سے قیمتی چیز ایمان رہ جائے گی وہ صرف اور صرف ایما ن ہوگا

صورتحال کچھ یوں ہے کہ  دور حاضر کے متعلق علما کرام اور محقیقین کا کہنا ہے کہ فتنوں کا وہ دور جو قرب قیامت  کی علامات کے  ساتھ وارد ہونا تھا

وہ  آن پہنچا ہے۔۔۔۔دور حاضر میں ہماری نسل نو کے لئے  بڑی ٓزمائشیں ہیں اور انبیا علیھم  السلام اور دور نبوت ﷺ  میں نوجوانوں کی بڑی تعداد نے جہاں حق کو قبول کیا وہیں ان کے لئے انبیا نے نوجوانوں کے لئے تزکیہ و تربیت پر زیادہ توجہ دی۔ہم دیکھتے ہیں کہ اصحاب صفہ ہوں یا نوجوان سپہ سالار صحابہ کرام ایک لمبی فہرست موجد ہے

آج کے نوجوانوں کو موجودہ دور جسے علما نے فتنوں کا دور قرار دیا ہے اپنی کون کون سی متاع کو پران چڑھانا ہے۔۔۔کن کن چیزوں سے مدد لینی ہے کہ اس دور پر آشوب میں اپنی سب سے قیمتی چیز ایمان کو بچا لیں۔۔آئیے سمجھنے کی کوشش کرتے ہیں

ایمان باللہ 

جس  خالق نے پیدا کیا ۔۔۔نعمتوں سے نوازا اس کی ان گنت اور بے شمار نعمتوں میں سب سے بڑی نعمت مسلمان گھرانے میں  ہماری پیدائش ہے

ایمان  باللہ ایک قیمتی ترین چیز ہے جس کے پیچھے شیطان ہر وقت تاک میں رہتا ہے ۔۔۔۔ ایمان کا معاملہ بہت  نازک ہے ۔۔یوں جانئیے کہ دنیا کی تمام دولت  ۔۔۔آسائشیں ایک جانب اور ایمان جیسی قیمتی متاع ایک جانب

خوف آتا ہے کہ زندگی بھر تو مسلمان کہلائے جاتے ہوں مسلمانوں میں شمار ہو لیکن جب آخرت  آئے  تو  اعمال کی بنیاد پر حضور اکرم ﷺ کی پکار ’’ امتی امتی‘‘ کا جواب لبیک لبیک نہ دے سکیں

عمر بھر نام تو مسلمانوں والا ہو جو رب پر ایمان رکھتے ہیں لیکن رب کی جستجو اور تلاش میں جدوجہد نہ کی ہو

پس تم مجھے یاد رکھو میں تمھیں یاد رکھوں گا    القرآن

سارے جہاں کا خالق و مالک   اتنی بڑی کائنات میں ہم جیسے حقیر سے زرے کو یاد   کرے تو اس سے بڑی سعادت کیا ہوگی اور پھر ہمیں کسی اور کے یاد کرنے یا نا کرنے کی کیا خواہش یا ضرورت رہ جائے گی؟؟اس عقل مند بڑھیا کی طرح فیصلہ کیجئے کہ جب بادشاہ کے محل  میں  عوام کے لئے خزانوں کے منہ کھول دینے پر ۔۔۔۔وہاں سے چھوٹی موٹی چیزیں اٹھانے کی بجائے بادشاہ پر ہاتھ رکھ لیتی ہے کہ مجھے تو بادشاہ چاہئے

کہ ’’بادشاہ مل گیا تو اس کے تو سب خزانے ہی مل جائیں گے‘‘

کائنات کا بادشاہ کیسے ملے گا!!!!! رب تو وہ سب کا ہے امیر کا بھی غریب کا بھی۔پڑھے لکھے کا بھی ان پڑھ کا بھی ۔۔۔

جو مانتے ہیں ان کا بھی وہی رب ہے اور جو نہیں مانتے ان کا بھی وہی رب ہے بھلے وہ اس حقیقت سے کتنا ہی انکار کریں

صد شکر کہ ہم ماننے والوں میں سے ہیں۔۔۔ہم چاہتے بھی ہیں کہ ہمارا رب ہم سے راضی رہے۔۔۔ہم جانتے ہیں کہ اگر وہ خفا ہوگیا تو دنیا بھر کے خزانے ہیچ ہیں۔۔۔۔۔وہ  راضی ہوگیا تو پھر اور کچھ نہیں چاہیے

رب کو کیسے راضی کرنا ہے!!!!

حی علی الفلاح

اذا ن پر فوری  لبیک کہیں۔۔۔جیسے ہمیں ہر چیز مکمل  چاہئے  ہوتی ہے۔۔۔وضو کرتے سوچیں کہ ہم رب کائنات کو ملنے جارہے ہیں۔۔نماز کی مکمل رکعت آرام سے ادا کریں۔۔۔ایسے جیسے ہم کسی شہنشاہ سے ملنے کھڑے ہیں۔۔ترجمہ پر غور کرتے ہوئے کہ کہہ کیا رہے ہیں۔۔۔دعا اپنے لئے سب سے پہلے مانگیں پھر اہل خانہ ،دوست احباب،رشتہ دار ملک عالم اسلام۔۔دنیا سے گزر جانے والوں کے لئے ،شہدا کے لئے  سب کے لئے دعا کریں ۔۔دعا سے کایا پلٹ سکتی ہے حضرت عمر رضی اللہ عنہ کا قبول اسلام ایک بڑی مثال ہے

روزہ ایک ڈھال ہے

پیر یا جمعرات یا ایام ابیض یعنی اسلامی مہینوں کے ۱۳،۱۴،۱۵ تاریخوں کے روزے۔۔روزہ ایمانی قوت کا بڑا ذریعہ ہے۔اللہ کی قربت اور روزہ کے دوران اللہ کے احکامات کی پابندی انسان کو ایمان و عمل کی قوت دیتی ے

نوافل اور تہجد

جیسے دنیا میں کسی پسندیدہ شخصیت توجہ حاصل کرنے کے لئے ہم اہتمام کرتے ہیں ایسے ہی دو،۴ رکعت نوافل۔۔۔رات جب آنکھ کھلے سحری سے قبل اس وقت تہجد کے نوافل تو افضل ہیں۔۔ بقول ڈاکٹر ام کلثوم   اگر سوتے میں آنکھ کھلنے پر اذکار اور دعائیں یا  حفظ شدہ قرآن بھی پڑھ لیں تو یہ بھی تہجد میں شمار ہوگا

صدقہ و خیرات

کم از کم یا زیادہ سے زیادہ جتنی استطاعت ہو تحریک کے مالیات میں رقم جمع کروائیں۔جب بھی کوئی رقم یکمشت پاس آئے اس میں سے  فی سبیل اللہ حصہ نکال کر الگ  کرلیں۔کسی نیک کام کا ارادہ  کریں تب بھی اور کسی مشکل میں پھنس جائیں تب بھی نوافل اور رقم کا صدقہ اللہ کے حضور پیش کرنا افضل ہے

جان ،وقت اور صلاحیتیں بھی خدا کی راہ میں کھپانا

ہمیشہ کے لئے باقی رہ جانے والا عمل ہے جو اللہ کو محبوب ہے  وہ اللہ کے راستے ،اللہ کی جانب لگایا گیا وقت،صلاحیت اور کوشش ہے۔۔یہ ہمارا الست بربکم عہد بھی ہے اور معاملہ بیع بھی

بے شک مومنین نے اپنے جان اور اپنا مال اللہ کو دے دیا ہے جنت کے بدلے میں(التوبہ ۱۱۱)

میرے روز و شب کے نصاب میں میرا اپنا تو کچھ نہیں

تیرا قرض میری زندگی میری سانسیں تیری امانت

تعلق باللہ کو جانچنے کا پیمانہ

اپنا خوف الٰہی چیک کریں۔۔۔خوف الہی کا مطلب  صرف یہ نہیں کہ اللہ سے ڈرا جائے بلکہ اس کی ناراضگی سے کتنا خوف آتا ہے کہ آپ برے کام سے رک جاتی ہیں۔

دوسرا۔۔۔اس کی محبت کتنی حاوی ہے کہ اس  کی رضا کے خلاف کام کرتے رک جاتی ہوں۔۔۔۔اور یہ دیکھیں کہ اللہ نے کن کاموں میں مصروف کررکھا ہے

ایک بار ایک طالبہ پاس آئی۔۔اس کے چہرے پر اضطراب تھا۔۔آنکھوں میں آنسو تھے رندھے ہوئے لہجے میں اس  نے سوال کیا ۔۔کیسے معلوم ہو کہ اللہ ہم سے راضی ہے۔۔ ؟کیسے پتہ چلے کہ ہمارے اعمال ہمارا رب قبول کررہا ہے!!!!!

میں خود ایک لمحہ کے لئے خاموش ہوگئی اور مجھے لگا اللہ نے مجھے الفاظ دئیے۔۔۔یہ دیکھو کہ اگر بار بار اللہ نیک لوگوں کا ساتھ دے رہا ہے۔۔۔قرآن و سنت کی محفلوں میں لے آتا ہے۔۔تحریک کے کاموں میں لگاتا ہے۔۔کسی ناظمہ کسی تحریکی ساتھی کا فون یا میسج   آتا ہے۔۔۔تو جان لو اللہ تم سے پیار کرتا ہے اور تمھیں دنیا میں خود کو ضائع نہیں کرنا  چاہتا بلکہ اپنی رحمت اور مہربانی میں لینا چاہتا ہے  کیونکہ اللہ فرماتا ہے ـ’’ میں جس پر مہربان ہوتا ہوں اسے دین کا فہم عطا کرتا ہوں‘‘

چنانچہ  ہر ایسی دستک کو جو آپ کو اللہ والوں سے ملائے۔۔ان کے ساتھ اٹھائے بٹھائے۔۔ان کے کاموں میں لگائے اسے  من جانب الہ سمجھ کر اللہ کی دعوت قبول کریں کوئی بھی نہیں چاہتا ہوگا کہ اللہ کی دعوت ٹھکراکر بدنصیب کہلائے

استغفار

تعلق باللہ  کا بہترین ذریعہ استغفار ہے

چلتے پھرتے اٹھتے بیٹھتے ’’استغفار‘‘ کو اپنا معمول بنالیجئے۔استغفراللہ کا ورد ہو یا لاالہ الا انت سبحنک انی کنت من الظلمین۔۔یا  سید الاستٖغفار جو بھی ممکن ہو ہر وقت وضو بے وضو ،،معمولات زندگی ادا کرتے اپنی زبان پر جاری رکھیں۔۔ہر نماز کے بعد ایک تسبیح کیجئے۔کم از کم استغفراللہ اپنی زبان پر ہر وقت ہر حال میں جاری رکھیں

رجوع الی اللہ

سارے در بند ہوسکتے ہیں۔۔۔۔ہر کوئی منہ موڑ سکتا ہے ۔۔۔ہر ایک ہمیں مایوس کرسکتا ہے سوائے ہمارے پیارے رب کے۔۔۔ہم خطا کار بندے ہیں اس رب جلیل کے۔۔۔کوتاہی بھی ہوجاتی ہے۔۔شیطان ۲۴ گھنٹے پیچھے ہے۔۔اس نے تو چیلنج کررکھا ہے نا۔۔۔تو کوئی بات نہیں بندے تو ہم اللہ ہی کے ہیں۔۔۔اور ہمارا پیارا رب ۔۔۔کریم  و رحیم رب۔۔اسے رجوع کرنے والے زیادہ پسند ہیں۔۔۔جو اگر بھول چوک سے جانے انجانے میں ا س کے بندوں سے غلطی ہوجائے تو  واپس اس کی طرف پلٹ جانے والے سے زیادہ پیار کرتا  ہے۔۔۔یقین مانئیے اس پیار کو رجوع کرنے والے ۔۔استغفار کو معمول  بنانے والے ضرور محسوس کریں گے

تعلق باللہ کے لئے جو سب سے بنیادی  ضرورت ہے وہ ہے فکر آخرت

ہائے  کبھی منظر سوچیں۔۔۔حشر کا میدان سجا ہو۔۔دربار میں تمام انبیا بیٹھے ہوں۔۔۔رب تعالیٰ تخت نشیں ہوں۔۔۔ساری سہیلیاں دوست احباب رشتہ دار دنیا بھر کے لوگ موجود ہیں۔۔۔۔اور امت محمدی  کے طور پر پکارا جائے تو ہمارے محسن۔۔ہادی و رہبر ﷺ پر امید نگاہوں سے ہماری جانب دیکھیں۔۔۔۔اورہمارا اعمال نامہ پیش ہو

دائیں اور بائیں فرشتے  اچھائیوں اور برائیوں کا رجسٹر لئے حاضر ہوں۔۔۔دائیں اور بائیں پلڑے  نصب ہوجائیں۔۔۔اعمال پیش ہورہے ہیں۔۔نیکیوں پر ہم پھولے سما رہے ہیں اور برائیوں پر ۔۔۔۔ اللہ کے دربار کی شان۔۔انبیا کرام ہیں۔۔۔حضور اکرم ﷺ ہیں۔۔۔سارے واقف سارے عظیم لوگ ہیںں۔۔۔سر تو انکار میں ہی ہلے گا

نہیں نہیں اللہ جی یہ ہم نے نہیں کیا۔۔۔ہمارے اعضا بولے گے۔۔کیا ہے کیا ہے۔۔۔وہ کام کرتے ہوئے آثار یعنی زمین،کرسیاں،موبائل،میسج باکس،ای میل۔پنکھے،دیواریں سب بولنے لگ جائیں گے ۔۔۔اس نے کیا ہے کیا ہے۔۔۔۔ہم پھر بھی انکار کردیں گے اور حشر کے دربار میں سارے جہان کے سامنے ہماری کارگزاری کی فلم چلادی جائےگی۔۔۔ سب کے سامنے ۔۔حضور اکرمﷺ کے سامنے۔۔۔انبیا کے سامنے۔۔۔

اور دوسرا منظر سوچیں ۔۔حشر کا دربار ہو اور  اور اللہ فرمادے

یہ بندہ دو عالم سے خفا میرے لئے تھا۔۔فرشتے نیکیاں بول بول تھک جائیں۔۔۔ہمارے اعضا بولیں کہ یا اللہ اس نے تیرے راستے میں ہمیں تھکا مارا۔۔۔۔آثار پکاریں یا رب یہ بڑے آرام سے شیطان کے پیچھے چل کر آپ کو خفا کرسکتا تھا لیکن  اس نے  اپنے نفس پر تیری رضا کے لئے قابو کیا

اللہ کے پیارو۔۔۔آخرت   کی فکر کر لو اس دن رب راضی ہوجائے۔۔۔ہائے ہائے اس دن ہماری نبی کریمﷺ ہماری پیشی پر شرمندہ نہ ہوں۔۔۔۔ہائے ہائے اس دن پل صراط سے گزر ہوجائے۔۔بھڑکتی آگ سے بچت ہوجائے۔۔۔ یا الٰہ۔۔۔اس دن اپنے نبی کریم ﷺ سے حوض کوثر سے شیریں دودھ پینا نصیب ہوجائے

خدایا ایسے اعمال ہوجائیں کہ تو ہم سے ہمارے والدین ہمارے سب پیاروں سے راضی ہوجائے

زندگی ایک مہلت عمل

یہ سب آسانی سے نہیں ملے گا۔۔۔۔اس کے لئے کشت کاٹنے پڑیں گے۔۔۔اپنی زندگی کا راستہ خود کھودنا اور تعمیر کرنا پڑے گا

یہ جو فتنوں کا دور ہے اور اس دور میں جو ہر دوسرے سکینڈ آنے والے منظر میں خدا سے غافل کردینے کا پوری حشر سامانی موجود ہے

کب کہاں کس وقت زندگی کی مہلت ختم ہوجائے اور ہاتھ میں پکڑے سیل سے کچھ ڈیلیٹ کرنے کا ۔۔لاگ آوٹ کرنے کا موقع بھی نہ ملے۔۔۔

جوان۔بچے بوڑھے دھڑا دھڑ دنیا سے جارہے ہیں۔۔آج وہ مرے کل ہماری باری ہے۔۔۔

ایسا نہ ہو کہ موت اچانک آجائےتو کانوں میں لگے میوزک کا ہیڈ فون بند کرکے کلمہ پڑھنے کا موقع نہ ملے(خدانخواستہ)

مایوس تو وہ ہو جس کا رب نہ ہو!!!

یہ نہ ہو کہ رب سے مایوس کرنے والا شیطان ہماری آخرت ہمیشہ کے لئے برباد کردے ۔۔۔سخت سے سخت گناہ ہوجائے رب سے مایوس ہوکر اپنی زندگی اپنے ہاتھ میں نہ لیں۔۔رب کے حوالے کردیں۔۔اس کی رحمت میں رجوع کر لیں۔۔اس  کے قرآن سے مدد لیں۔۔اس کےحبیب  نبی ﷺ کی تعلیمات۔ان کی سنتوں ان کی احادیث سے مدد لیں۔۔۔ہمارا رب اپنی جانب پلٹنے والوں کو تھام لیتا ہے۔۔کبھی بھی مایوس نہ ہوں شیطان کا ہتھیار ہے رب سے مایوس کرکے خودکشی کی طرف  نہ جائیے گا کہ آخرت ہی مکمل برباد ہوجائے ۔۔اور بخشش  کا پتہ ہمیشہ ہی کے لئے  کاٹ دیں۔۔۔نجات کی کوئی سبیل ہی باقی نہ رہے۔۔زندگی تو جیسی تیسی کٹ جاتی ہے اگر آخرت میں رب کی رحمت سے اس وجہ سے محروم کردئیے گئے تو یہ بہت بڑی نادانی ہوگی۔۔۔سخت سے سخت حالات میں۔۔بڑے سے بڑے گناہ کے بعد بھی اپنی زندگی کے مالک نہیں بن جاتے یہ اللہ کی امانت ہے۔۔۔وہ رب جو بڑے سے بڑے گناہ کے بعد بھی دل سے کئے استغفار اور دوبارہ گناہ نہ کرنے کے ارادے پر اپنی رحمت میں۔۔اپنی رضا  کی چھاوں میں لپیٹ لینے کا منتظر رہتا ہے۔۔۔اپنے رب کی رحمت سے کبھی بھی مایوس نہ ہوں۔۔۔اپنی زندگی خود ختم کرکے رحیم وکریم رب کی محبت کو غضب میں بدلنے کی غلطی کبھی بھی نا کیجئے گا ۔۔۔وہ تو منتظر ہوتا ہے کہ میرا بندہ کب میری طرف پلٹے ۔۔۔دنیا مایوس کر سکتی ہے رب کبھی بھی مایوس نہیں کرسکتا۔۔۔۔

وہی رب ہے جو سب ہے

بارش کے قطروں کی طرح برستے فتنوں کے اس دور میں رہتے ہوئے یاد رکھنا کہ میرا  رب میرا مالک مجھے دیکھ رہا ہے۔۔وہ مجھ سے غافل ہے نہ کبھی بھول سکتا ہے۔۔۔منتظر ہے۔۔۔میرے اپنے طرف پلٹ آنے کا۔۔مجھے اپنی رحمت میں سمیٹنے کا وہ ستر ماوں سے زیادہ پیار کرنے والا کہیں مجھ سے خفا نہ ہوجائےوہ میرے ایک قدم پر دس قدم میری  جانب آئے گا۔۔۔لیکن وہ ایک قدم مجھے اٹھانا ہوگا۔۔۔۔وہ اپنی طرف چل کر آنے والوں کی طرف دوڑ کر آتا ہے۔۔۔سو رب کی طرف چلنے کی ہمت اور ارادہ ہمیں خود کرنا ہوگا،،تو ہمارا مالک ہماری طرف بھاگ کر آئے گا

اللہ کے پیارو۔۔۔ فتنوں کے اس دجالی دور میں جب ہر ہر چیز  رب سے اس کی رضا سے دور لے کر جانے کو بے تاب ہو۔۔۔آپ ضدی بچے کی طرح اپنے رب کی رضا کے لئے ڈٹ جائیے،دنیا الٹ پلٹ ہو جائے ۔۔۔۔ادھر سے ادھر ہوجائے۔۔۔کاموں کے پہاڑ ہوں۔۔۔اپنے رب سے اپنا تعلق کمزور نہ پرنے دیں

اپنے ایمان باللہ  کی حفاظت کیجئے۔۔۔کیسے؟؟؟

نمازوں،تلاوت قرآن،نوافل،اذکار،تہجد،صدقہ و خیرات،استغفار اور فکر آخرت سے اس کی آبیاری کیجئے

اللہ نے جن چیزوں کا مکلف کیا ہے ان کو پہلے درجے میں ادا کیجئے مثلا والدین کی  فرمانبرادی،جھوٹ ،غیبت سے بچنا،رزق  حلال،صحبت صالحہ

یہ ۵ وہ کام ہیں جو فتنوں کے اس دور میں ان شااللہ آپکے تعلق باللہ کو مضبوط کریں گے اور دجالی دور میں ایمان آخرت کی کامیابی کے لئے سلامت رکھیں گے

ایسے تمام کاموں سے یا تو مکمل اجتناب کریں یا کم از کم وقت ان پر لگائیں جو آپ کے تعلق باللہ کے رستے میں رکاوٹ بنیں

مثلا   بے مقصد گفتگو۔۔بحث و مباحثہ۔۔۔اور بے مقصد گھومنے پھرنے سے گریز رہے

لمبے لمبے ٹاک شوز کی بجائے اخبارات کا ۔۔کالمز کا مطالعہ مفید رہے گا

تفریحی چینلز اور سوشل میڈیا کے لئے وقت مقرر ہو کہ بس اتنا وقت دینا ہے۔اس سے زائد نہیں۔۔اس پر خود کو کاربند کریں

ایک اہم اور مفید عمل یہ ہوگا  جس کے لئے آپ کو بہت محنت کرنا ہوگی۔۔۔لیکن اس کے اثرات سکون،اطمینا اور اس کی خوشگواریت آپ خود محسوس کرسکتے ہین

وہ ہے نمازوں کے اوقات کے ساتھ اپنا ٹائم ٹیبل مقرر کرنا

فجر میں جاگنا۔۔ہلکی پھلکی چہل قدمی،بھرپور ناشتہ۔۔دن بھر کی مصروفیات۔۔ظہر کے بعد مختصر آرام عصر کے بعد مطالعہْْمغرب کے بعد فیملی ٹائم یا اپنے امور ۔۔۔عشا کے بعد کھانا کھا کھا کر ہلکی سی چہل قدمی ۔سونے سے قبل ہلکا پھلکا اچھے ادب کا مطالعہ۔۔۔اور دس بجے تک سوجانے کا معمول۔۔مسنون ہونے کی وجہ سے بہت زیادہ مفید رہے گا

فارغ نہ رہیں۔۔خود کو مصروف رکھیں۔۔کسی نادار کو پڑھانا شروع کردیں۔۔۔کوئی  skill آتا ہے وہ آگے سکھانا شروع کردیں

صحبت صالحہ ۔۔ اپنی صبف کے ایسے لوگوں کے ساتھ دوستی کریں جو قرآن و سنت کے قریب ہوں،ایسی کلاسز اجتماعات میں اہتمام سے کوشش کر کے جائیے جہاں قرآن و سنت پڑھا پڑھایا جاتا ہو۔

ایمان جیس قیمتی چیز فتنون کے اس دور میں ازلی ابدی دشمن شیطان ،دجال اور دجالی  چالوں سے بچانے کے لئے درج بالا محنت تو کرنا ہوگی کیونکہ معاملہ ہے ایمان کا

رب کی رضا کا۔۔۔ہماری دنیا کا۔۔۔ہماری آخرت کا۔۔

سودا ہے جنتوں کا۔۔۔۔آخرت کے دن نبی کریم ﷺ کی اور قرآن کی شفاعت کا

تو کیا آپ تیار ہیں؟؟؟؟

فریدہ یوسفی لاہور